خليني أشوفك
لما قلبي ف مرة يغلب عقلي لحظة
ابقى خليني أشوفك
أسرق الدهشة ف كسوفك
تعلى نبضاتي ف دفوفك
وأبتسم من كتر خوفك
رغم أني بردو خايف
صدقي نبضي اللي حالف
عايزك أنتي زي ما أنتي
قلبي شافك من زمان
لو بكيتي وابتسمتي
أنتي بستان الحنان
ترسميني بين حروفك
وأسألك رغم إني عارف
أنتي يا أحلى شفايف
ساكتة ليه ما تقولي حاجة
موش كفاية يبقى أحمر لون خدودك
موش كفاية إني سامع قلب ببعزف لحن
عودك
ليه عنيكي بتستخبى من جمالها بين
رموشك
والخجل عني يحوشك
يا اللي هربانة ف شرودك
اعبري ف لحظة حدودك
وافردي لحلمي كفوفك
واوصلي لقلبي اللي راجف
يا اللي سحرك قلبي خاطف
لسة ليه ع الماضي باكية
وف عنيا حضن دافي
بلسمي للجرح شافي
يبقى ليه مني تخافي
مانتي عارفة إني بحبك
أي ما كانت ظروفك
مهما كان الحزن عاصف
فبعنيكي لسه شايف
محمد حمدي غانم
20/2/2013
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.