أنا حبي ليكي معجزة
كام مرة أقولك إقبلي
يا أحلى وردة هتدبلي
أتاريكي مغرورة بحسنك وامّا أسيبك تزعلي!
إيه يعني حلوة وتِهْبِلي؟
ما تبطلي تستهبلي
هُوّ انا يعني عشان بحبك تبعدي وتدّلّلي؟
يا بدري عايزك تنزلي
بأنوثة، مش تـذّلّـلي
ولاّ انتي فاكرة لما أشوف دمعة عنيكي يِلِذّ لي؟
طب ليه بقى بتسـتسـهلي؟
ما تهندسي وتحلّلي
هُوّ انتي جربتي فِ مرة من مشاعري تنهلي؟
وأنا وعد مني: هتُذهلي
وعلى سذاجتك تزعلي!
دا انا حبي ليكي معجزة ومعدِّي ما تتخيلي
طب راجعي عقلك واسألي:
هل حبي ليكي مرحلي؟
أنا حبي لِكْ زي الدهب ودا كل ما يقدم غِلِي
فاوعي بمشاعرك تبخلي
عدِّي حدودي وادخلي
وارمي سلامك جوه قلبي وْأقوى ضمة استحملي
دا انا حضني دافي ومخملي
وشفايفي ورد قُرُنْفلي
لو دُقتي منه قطفة واحدة العمر فِ عْيونك حِلِي
فتعالي بقى واستعجلي
خلي عنادك ينجلي
يا وردتي مشتاق بحبّي ارويكي قبل ما تدبلي
محمد حمدي
غانم
16/1/2016
________________________
من ديوان فنجان وجع.. للتنزيل:
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.