واحدة بس!
جميلة قوي وعندية ونكدية بدم خفيف!
رقيقة وقلبها أبيض ولو حتى غضبها عنيف
قوية وخايفة من بكرة، مقضية حياتها خريف
وعاشقاني لكن فكرة
وعايزاني ومش ناكرة
وقارية كلامي ومذاكرة
وسايباني في وضع سخيف!
يا خايفة منّي أو منِّك
وإنتي منّي، أنا منك
رميتي الورد اكمنك
أذاكي الشوك بجرح خفيف
وأنا شايلك ف مكنوني
وعاشقك زي ما تكوني
وعارفك زي ما أعرفني بدون تزييف
وحافظ كل أخطائك تحبي إني أسمّعهم بدون تحريف؟
جميلة قوي وعندية ونكدية بدم خفيف
قوية وخايفة من بكرة، مقضية حياتها خريف
....
كفاية الخوف يا مجنونة
مفيش ولا حاجة مضمونة
بحبك حب في الدنيا ملوش تعريف
يا ساكنة القلب إزيّك
مفيش في الدنيا دي زيّك
بحسنك ولا بعيوبك هتفضل عِفّتك زِيّك
وأجدع طبع متشرب أصالة الريف
تعالي الوقتي صالحيني
وجوّه عنيكي خبّيني
بعنف ورقة حبّيني
وضميني بقلب عفيف
عشان تبقي ف حياتي الجاية عايشة بجد مش تخاريف!
محمد حمدي
غانم
23/9/2016
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.