هو كدا
متعقدة؟
ما تقولي م الأول كدا
دكتور أنا في الأمر دا
خطوات علاجي مؤكدة
هنفك قلبك نغسله
ونهشتكه وندللـه
لو نبضه مايل نعدله
ونصونه من كيد العدا
أيوة كدا، أيوة كدا
وأروح لعقلك أفتحه
من كل ماضي أمسحه
وأحط وردي مطرحه
ومعايا أنا فكره ابتدا
أيوة كدا، بالشكل دا
أما عيونك لا بلاش
دا جمالها طاغي يا واش يا واش
أنا قلبي ياما ف نورها عاش
لكن لفترة محددة
طب ليه كدا؟.. ينفع كدا؟
حضنك ف حضني مَسكَنُه
من ضمة واحدة تسكّنه
ولا حاجة تاني تعكننه
يسمع غنايا والصدى
طول المدى، طول المدى
جربتي مرة؟.. مكانش أنا
غلطانة واخترتي الضنا
ولا عمره فرحك غير هِنا
مخلوقة ليا مؤبدة
هو كدا، أيوة كدا
إياكي تاني تفكري
ولا عني يوم تتحيري
دا معايا أنا تتحرري
وتلاقي بين حضني الرضا
فجأة كدا.. علطول كدا
وإذا كنتي يا ستي بقى
من فك عقدة مقلقة
خلي مشاعرك في اللُقا
حوالين مشاعري معقدة
بالشكل دا.. أحلى كدا
عايزة وخايفة.. مش كدا؟
والحب ينفع غير كدا؟
يلا بقى انسي كل دا
ولا تبقي يوم مترددة
قلبك كدا.. ليا اهتدى
أيوة كدا.. دايما كدا
محمد حمدي
غانم
26/9/1026
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.