هاغشش قلبك
مش هتقولي لقلبي كلام
معسول
مغزول بخيوط الحب
رَهِيف؟
مش هتقولي:
"عشقتَك من يوم شُفتَك دهشة عمري
عشق عفيف؟"
مش هتقولي:
"باحبَّك
حب الموج الدافي لشطه ف ليلة صيف؟"
مش هتقولي:
"حضنتَك جوا القلب العاشق
صورتَك غنوة وطيف؟"
مش هتقولي:
"يا أجمل حلم حلمته
الوقت سرقنا وعمرنا ضيف؟"
مش هتقولي:
"تعالى نكمّل بعضنا
نسرق فرحنا قبل خريف؟"
مش هتقولي:
"خلاص أنا آسفة عشان زعلتك
انسى دا كان تخاريف؟"
ولاّ أقولِك:
قولي "باحبَّك" واسكتي خالص
سيبي شعورنا يضيف
مش هتقولي؟
محمد حمدي غانم
3/5/2017
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.