وردة بتصبّح عليكي
نُونْتي:
يا أحلى انا من بره مني، وجوه منّي أحلى إنتي!
بعد الديباجة والسلام
وكتير كلام حلو الكلام
عايز أفكر بس قلبك إنه ترحالي ومدينتي
وان انتي عندي حلم غالي وإن عمرك يوم ما هنتي
وإنّي أنا فْ جرحك بسامحك زي بنتي!
عارفك وعارفة: قلبي ليكي
كون بحاله بلون
عنيكي
وانتي نجمة فيه
سكنتي
وإنّي باحبّك مهما كنتي
طب ليه مباعدة عن عيوني؟
قرّبي لي حتى سَـنتي
دا غير ضلوعي ما كان مكانك،
غير هواكي ما
كان مكانتي
ولا إنتي تاني هملتي قلبي، وفوق رفوف الخوف ركنتي؟
إياكي لحظة تكوني خنتي
عايزك أصيلة زي ما إنتي وليا صنتي
وأنا بهدي ليكي
وردة بتصبّح
عليكي
فالمسيها
واحضنيها
زي ما فْ قلبي
اتحضنتي
دايما بحبك،
وادي إمضت،
حد من جواكْ انا
يتمنّى يبقى
ليكي من برّاكي انتي!
محمد
حمدي غانم
6/3/2016
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.