غــزال
يا عيون غزال
يا اللي الإجابة في حسنها مليون سؤال!
هُوّا حرام إني أحبِك أو حلال؟
مين اللي قال
من يوم ما شفتِك إن حُبِّـك يبقى في القلب احتلال؟
وسنين طوال
عمر اللي كان صابر ما نال
والهجر فوق الاحتمال
حدوتة ولا تخطر ببال!
البدر إسود ليل كحيل بيغني في حضن الهلال
في عنين جريئة لما تؤمر يبقى للقلب امتثال
وعشانها خارج من حكايات الخيال
من لهفته فارس جميل الحلم يتحدى المحال
لكنه في آخر المآل
صياد وصاده الاغتيال
السهم كان في القوس في إيده, ولا في رمش الغزال؟!
يا اللي الزمن توّج عنيكي آية فوق عرش الجمال
الكون يدور يِفنِي الصبايا وانتي شاطرة ف الاحتيال
وعشان كدا سايقة الدلال
مغرورة وبعيدة المنال
ودا مين يلوم ريم البراري لما تمشي في اختيال؟
ونسيم بعطر الشَّعر طاير شِعر يتغزّل ضفايرها وضحكتها
تشق الصخر في قلوب الرجال
مسكين أنا بقى حالي حال!
من يوم ما شفتك ليه أنا صِرت السؤال؟!
وانتي الإجابة وانتي مليون احتمال؟!
محمد
حمدي غانم
21/9/2015
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.