قرصة ودن
يا اللي انتي عايزة تعشقيني بس بشروطك
طب كنتي قولي قبل ما اهوَى لملمة توتك!
ليه حاطة دايما كبريائك فوق مشاعرك؟
ومكانش ليه يكفي كرامتك إني شاعرك؟
وإني غزلت ف حلمي توب الحب بخيوطك؟
يا اللي انتي مشْ قادرة تْفوتيني عمري ما هَفوتك
أنا لسة بحلم يوم يدوب فِ شفايفي بَسكوتك
ولا انتي ناوية تعذبيني تاني بِسكوتك؟
وتضيّعي كل اللي كان من قبلي بيفوتك؟
لمّي حروفك وانطقي
اتكلمي
على حبي لا تتكتمي
عن حضني لا تتلجمي
وبكلمة واحدة قولي أجمل بيت في شِعري الملحمي
وعلى ضلوعي اتحطمي
هو انتى ايه إلا فراشة تهيم بنوري وجوا ناري ترتمي
مقصدش إنك بس سكر حلو في قالب جميل
أنا عمر قلبي ما كان فِ يوم للتافهات يقدر يميل
وأنا لما عيني بتعشقك
فلإنّ قلبي مصدقك
بس آنا عايزك بين إيديا بردو جارية!
إحساس جميل إني أملكك!
دي حاجة ليا، بس مش بتقلّلك
دا سر بينا بس، لمّا أدلّلك
وف دفء حضني تدوبي لمّا أكمّلك
وف شِعري لما تطيري أحلى فراشة وأفضل أجمّلك
من غير كدا عمر المعادلة ما تتزن
سر الحياة زوجين خلقهم ربنا من كل شيء
موجب وسالب جاذبية للحياة ترسم طريق
إحساس بريء بالانتماء فِ قلوبنا له أجمل بريق
تبقى المعادلة باختصار:
تتحمّليني أتحمّلك
أما إذا فكرتي لحظة تجرحيني انا بردور أقدر أكْسرك
وبكلمة ممكن أخسرك
وف شِعري زي ما يوم غازلتك أنهرك
يمكن يكون تهديد لكنّي باخيّرك
إن كنتي خايفة من مخالبي
فتعالي حالا جوا قلبي واستخبّي!
وأوعاكي يوم تتلخبطي وتظني إن الرقة ضَعف
أنا سهل جدا انّي اورّيكي فْ قساوتي ألف ضِعف!
والغيرة نار وأمرّ من كيد النسا.. وصناعتي حَرف!
وعشان تحسي وتستحي
حبيت أحطك مطرحي!
ودي بس قرصة ودن لو يوم تاني فكّرتي لكرامتي تجرحي!
فإن كنتي غلطانة، لقلبي استسمحي
وما دام بقى قُلتي شروطك
فاستحملي منّي شروطي
أنا بس بارْسم لك خطوطي
فإذا كُنت عاجبك آدّي واجبك واشربي من خمر توتي!
واختاري حبي فوق كرامتك وارْسِي في جنة شطوطي
قبل أمّا من شوقك تموتي!
ولا تسعديني بلملمة توتك
ولا يوم يدوب فِ شفايفي بَسكوتك
محمد حمدي غانم
4/10/2015
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.