ومين عارف
ومين عارف؟
ما يمكن بكرة أتنفس عبير شَعرك
وأدوق في البسمة طعم الشهد في مشاعرك
وأغنيلك ما طول عمري أنا شاعرك
وأكون فرحان ومش خايف
ومين عارف
ما يمكن بكرة ألاقيكي
أتوه تاني في دفا عنيكي
وأسيب الدنيا وارمي همومي ف إيديكي
وأهيم في حلمنا الوارف
ومين عارف
تفوت الفكرة والفكرة
ولية لساكي مش فاكرة؟
تغيبي سنين بلا معنى وبردوا أنتي أمل بكرة
ها أقول لك كلمة متذاكرة:
هتبقي لي وأنا حالف
وأنا عارف:
وليك عازف:
بحبك يا أم توب وردي
ولم يدبل في يوم وردي
تطول السكة هنعدي
وتتشابك أيادينا
وتحضنا أمانينا
ومهما تتوهي عن وعدي
قصاد قلبك أنا واقف
لأنك مش أمل زائف
بجدد دعوتي ليكي
تكوني لي وأكون بيكي
أنا دايما بشوف فيكي
سنين طارحة وأمل هادف
دا يمكن بكرة... مين عارف؟
محمد
حمدي غانم
26/10/2014
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.