المتابعون للمدونة

السبت، 5 سبتمبر 2015

الحب بالقلم الرصاص


الحب بالقلم الرصاص! 

لِى نقول "خلاص"؟
ما لناش خلاص
هو اللي بينا سنين رخاص؟
ولا انتي كاتبة الحب بالقلم الرصاص؟
وبكلمة أستيكة هنمحي العمر من غير التماس؟
خلينا نبدأ م الأساس:
الحب عندك من إزاز؟
ولا ف عنيكي الحب ماس؟
يعني ببساطة شيء بيجرح
ورخيص ولكن حده يدبح
وبضربة ممكن نكسره؟
ولاّ بغلاوته القلب يفرح
مش للقساوة بخدشه يسمح
جوّانا لما نقدّره
يملانا بالنور والحماس؟
عارفة الإجابة ولاّ ضيعتي الكتاب؟
وحلفتي انّك تكتوي بليل الغياب
وتحطّي عِندك راس براس؟
فيه واحدة عاقلة تشتهي طعم العذاب؟
وغرورها يأمرها تسيبني وتجري من خلف السراب؟
ومفكرة الحرية وِحدة وقلب مدفون في التراب؟
مع أنها غرقانة فيا لشوشة القلب اللي لاص!
وأسيرة ليا مفيش خلاص!
مش تعقلي وتيجي وخلاص؟
محمد حمدي غانم
11/8/2015

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

صفحة الشاعر