أنا بس مش عارف
وحـدي ومُـش خايف
يـمـكـن أكـون بحلم
أو لـسـه مُـش شايف
أنـا بـس مش عارف
يـمـكـن أكـون بندم
عـلى حلم كان جارف
والوهــم جـنـنـي
أنـا قـلـبي ضاع مني
مـا بـين سفر وبحور
بـيـن الظـلام والنور
راكـب بـسـاط الريح
شـايـل جـبال حزني
من تحتي موج مجروح
عـايـز يـمـوتـنـي
والغـربـة شـدتـني
ضـاعـت بـلاد فـيّه
أنـا نـجـمـة منسية
سابحة في ضلام الكون
وفـي لـيـلـة شتوية
طـلـت عـلى العميان
ضلوا ف شكوك وظنون
تـعـبـت تـنـاديـهم
لا هـمـا شـايـفـنها
ولا حـتـى سـامعينها
حـايـريـن وبيدوروا
عـلـى حـد يـرشدهم
فـيـن السـؤال يرسي
كـان نِفسي أكون نَفسي
وأتـخـيل إني اخترت
لـون السـمـاء ماسي
والعـطـر أنـفـاسي
وأرجع بريء كما كنت
أبـيـض بـلـون قلبي
أخـصـر بـلون النبت
هـايـم فـي نبع حنان
أنـا لـسة زي زمان..
بـحـلم وأنـا صاحي
وأصـحـى وأنـا نايم
وبـعـيـن ونص ببص
عـلـى رسمة بالألوان
فـيـهـا أمـل بـكرة
وبـكـرة عمره مجاش
دايـمـا بـعـيش اليوم
دائـمـا بـعـيش الآن
مـشـغوف لهوف قلقان
والحـلم يـخـدعـني
سـجـان يـحـررني
مـن حـبستي في نفسي
والمـادة والزمـكـان!
حـدوتة كان يا ما كان
واحـد شـريـد لـقيناه
مـاشـي وموش شايف
حـايـر ومـوش تايه
وحـده ومـوش خايف
فـاهـم وموش عارف!
محمد حمدي غانم
2/3/2010
_____________
الزمكان: الترجمة العربية لمصطلح Space-time المستخدم في النظرية النسبية.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.