المتابعون للمدونة

الأربعاء، 14 سبتمبر 2016

ألاعيبي يا حبيبتي كثيرة


ألاعيبي يا حبيبتي كثيرة
 

هتكسّري ورايا الجرّة = وتقفّلي الباب بالمفتاح؟!

طول عمري مستنيك برة = ولا يوم ف حبك قلبي ارتاح

إزاي تهددي بخسارتك = ولا مرة واحدة مسكت إيديك؟

روحي البسي كدا نضارتك = دور الضحية ما يمشي عليك

طب كنتي قصقصي جنحاتي = وداريني يا حبيبتي ف عشك

ولا أقول لغيرك غنواتي = ولا يوم تسمّيني باغشّك!

لكن هتفضلي سايباني = هفضل أطير أنا بمزاجي

وتلاقي غيرك عنواني = وأريحك من إزعاجي

أنا نفسي فعلا أتخصخص = وأسكن ف قلبك إنتي وبس

عندك جناحي يتقصقص = ولا يوم لغيرك تاني أبص

لكن هتفضلي تتغري = هدوقك تاني الغيرة

خليني أكشف لك سرّي = ألاعيبي يا حبيبتي كثيرة!

لو كنتي فعلا عايزاني = فكفاية ألغاز تربكني

أنا غالي، لو يوم شارياني = كلمة "باحبَّك" تملكني

خليكي بقى جدعة وشاطرة = وقوليها للي بيهواكي

دا الحب دا أحلى مخاطرة = وأنا بين ضلوعك أحلاكي

 

محمد حمدي غانم

14/9/2016

 

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

صفحة الشاعر