برجاء تسجيل الإعجاب بالصفحة لتصلك كتاباتي على فيسبوك

المتابعون للمدونة

الأحد، 16 فبراير 2014

باحبّك ليه؟



باحبّك ليه؟

عارفة باحبِّك ليه؟
سحرِك بيجنّنني
والشّوق ابن الإيه!
واخد موقف منّي
عمّال يتنطّط فِ ملامحي وأخبّيه يهرب منّي
حتّى عنادي كتير يبعدني وبارجع غصبًا عنّي
أصلِكْ جوّه النّني
صورتِكْ بتدفّيه
 
عارفة باحبِّك ليه؟
اسألي قلبي النّونو
لمّا عاندني ودقّ بلهفة وحطِّك جوّه عيونه
بيغنّيلِكْ: دقّة بإسمِكْ، دقّة تبوح بجنونه
صيفه شتاه طوّالي فْ رعشة ودايمًا مخطوف لونه
عيني يا قلبي النّونو!
مين هايسمّي عليه؟! 

عارفة بيحصل إيه؟
بابقى كتير باتألّم
وأصرُخ: موش هاستسلم
لازم أعود لكياني وعمري وأبعد عنِّك وأسْلم
لكن كلّ ما بابْعد
بارْجع تاني وأندم
باجي بعمري الجاي 

عارفة باحبّ إزّاي؟
باتْمنّى أخطف قلبك منِّك وأحطّه ف غنواية
غنوة حروفها ف دقّات قلبي وحلم جميل وحكاية
علشان لمّا تطلبي قلبِك تلاقيه داب جوّايا
يفضل عمره معايا
غنوة وحبّي النّاي 

عارفة باحبّ إزّاي؟
تعرفي إنتي تقولي:
لمّا بشوفِك قدّام منّي إزّاي باصْلب طولي؟
أو ليه الدّنيا بتتزوّق بالأحلام اللّولي؟
آه لو بسّ تميلي
يملا الدّنيا غُناي
بسّ ترقّي إزّاي؟ 

محمد حمدي غانم
1998

 


ليست هناك تعليقات:

إرسال تعليق

صفحة الشاعر