المتابعون للمدونة

الأحد، 28 مايو 2017

حكايات قديمة مكررة


حكايات قديمة مكررة 

النور عروج
الخوف خروج
حكاياتنا تايهة في البروج
والحلم شط اللي اترسم ف عيونه موج 

بيدق ف قلوبنا أمل
كل اللي غايب محتمل
بهتانة ف وشوشنا ملامح فن احساس ما اكتمل
متنكرين عن فكرة حرة معطرة بين المروج 

عايشين نخبي ضعفنا
من خوف قلوبنا إننا
في مواجهة نخسر نفسنا
ونضيع في لحظة مننا وسط التلوج 

يا ضِلّ ضَلّ على الطريق
باكية الخطى من غير رفيق
قلب البريء خدعه البريق
قصة قديمة مسطرة متكررة من ألف فوج 

ليه الجواب محتاج سؤال ملهوش جواب؟
وسطور كثير ممسوحة من متن الكتاب؟
وحاجات بسيطة غاوية تشرح نفسها بمعنى العذاب؟
والوهم كدب كبير في ليل الخوف يروج 

عند الحنين
طوابير طويلة من الألم متجمعين
مُستعبدين زي الزنوج
متعشمين
عايزين سفينة حلم ناجية من الأنين
ومن الأماني محملة من كل زوج 

محمد حمدي غانم
28/5/2017

 

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

صفحة الشاعر