برجاء تسجيل الإعجاب بالصفحة لتصلك كتاباتي على فيسبوك

المتابعون للمدونة

السبت، 20 مايو، 2017

راجعي نفسك



راجعي نفسك 

لما أكون لك طول حياتك أحلى ذكرى
وابقى أجمل حاجة مست نبض قلبك وانتي فاكرة
بس أشوفك من عنادك لسة ناكرة
اني نصك واني أُنسك
راجعي نفسك 

لما أكون واحشك بجد وما تقوليش ليا واحشني
واشتياقي يجيبني ليكي وقسوتك عنك تحوشني
وابقى سامع نبض قلبك دا داوِشْني
والغرور فيكي ينافسك
راجعي نفسك

لما أكون شمعة ف حياتك نورت من يوم لقانا
وانتي مش عاوزة تحاوطيها بإيديكي ف ليل هوانا
وف بعادنا القلق والشوق كوانا
والندم ساكن في حسّك
راجعي نفسك 

وأما أبص لواحدة تانية وتلاقيك بالغيرة حاسة
وانتي هتموتي عليا بس سايقة التقل لسة
ساذجة جدا.. انتي فاكرة إني هانسى؟
وانتي بدري وانا شمسك؟
راجعي نفسك 

لما تبقى بلاد ما بينا لسة فاصلة
وانتي حاطة بين كلامنا ألف فاصلة
بس بردو كل نبضة من مشاعري ليكي واصلة
حاسة شوقك سامعة همسك
راجعي نفسك 

لما ليل الشوق يلوعنا سنين
والغنا يفضل على فراقنا حزين
والمنى تبقى اللقا بعد الحنين
مرة من نفسي ونفسك
راجعي نفسك 

لما تبقي ف حقي غلطانة ومتعتذريش بدعوى كبريائك
كل فرحة حِلِمْـنا بيها تضيع علينا ف ليل فراقك
واشتياقي لهمس قلبك واشتياقك
بينادوكي ف عز يأسك
راجعي نفسك 

محمد حمدي غانم
14/5/2017

 


ليست هناك تعليقات:

إرسال تعليق

صفحة الشاعر